പാലാ: ഭർതൃപിതാവിനെ പരിചരിക്കാൻ വീട്ടിലെത്തിയ മെയിൽ ഹോം നഴ്സ് യുവതിയെ ലൈംഗികമായി പീഡിപ്പിച്ചതായി പരാതി. പാലായിലെ വ്യാപാരസ്ഥാപന ഉടമയായ യുവതിയാണ് പൊലീസിൽ പരാതി നൽകിയത്. 2024 ജൂലൈയിലാണ് സംഭവം നടന്നതെന്നാണ് പരാതിയിൽ പറയുന്നത്. സംഭവത്തിന് ശേഷം മാനസികമായി തളർന്നതിനാൽ ഇപ്പോഴാണ് പരാതി നൽകാൻ കഴിഞ്ഞതെന്നും യുവതി വ്യക്തമാക്കുന്നു.
പകൽസമയം വീട്ടിൽ ഭർത്താവും കുട്ടികളും ഇല്ലാതിരുന്ന സമയത്ത് മെയിൽ നഴ്സ് ജൂസ് നൽകി മയക്കിയെന്ന് യുവതി പരാതിയിൽ പറയുന്നു. തുടർന്ന് ലൈംഗികമായി പീഡിപ്പിച്ചുവെന്നാണ് ആരോപണം. നഴ്സ് വീട്ടിൽ താമസിച്ചാണ് ഭർതൃപിതാവിനെ പരിചരിച്ചിരുന്നത്. സംഭവത്തിനു പിന്നാലെ ഇയാളെ ജോലിയിൽ നിന്ന് ഒഴിവാക്കിയിരുന്നു.
ഇതോടൊപ്പം, ഭർത്താവിന്റെ സുഹൃത്തായ മറ്റൊരാളും ലൈംഗികമായി ഉപദ്രവിക്കാൻ ശ്രമിച്ചതായും പരാതിയിൽ ഉണ്ട്. പ്രതികൾ ഇരുവരും നിലവിൽ ഒളിവിലാണെന്നും, അന്വേഷണം ഊർജിതമാക്കിയതായും പൊലീസ് വ്യക്തമാക്കി.
